Tafsiri ya Voyage ya Mboso yakwake Adolph Dominguez na Wenge Musica

August 30, 2013

Na Lubonji wa Lubonji

Ni wimbo ambao uliwahi kuleta ubishani nani hasa mtunzi wake, Kuna nyimbo ambazo kwa mashabiki wa Wenge Musica kwa ujumla wanazikumbuka sana wimbo huu wa Voyage Mboso, Wengi walijua huu Wimbo ni Wimbo wa JB Mpiana lakini ukweli ni kuwa huu ulikuwa ni Wimbo wa Adolph Dominguez na ndio maana walipoparanganyika Werasson alikuwa akiupiga sana wakati bado yuko na Dominguez na walipoanchana Werasson aliacha kuupiga na Dominguez aliendelea kuupiga.

Kwenye Original Version utamsikia vizuri Ekokota Machine Roberto Wunda,kwenye vyombo ni Patient Kusangira, Didie Masela Vando Mass, Mbonda na wengineo. Kwa kifupi katika wimbo Voyage (Safari ) Mwimbaji Adolphe Dominguez anaongela Safari na hatari zake kwa wapendanao!!!

Nini toweli ngai nayoo : kitugani kinacho leta ugonvi kati yetu?
Awa natikali Likombe yaya : Tizama ninavyo baki mpweke Kaka yangu!!!

Wapi O remplacer Ngai Voyage : Safari, Lini ukaja kuchukua nafasi yangu kwenye ndoa…

Mbala ya sima nako Refuser : mara nyingine sintokubali (usafiri)
Voyage!!! Ponini usalaka boye!!! : Safari!!! kwanini hufanya hivyo!!!

Okotika moto na Soucis!!! : wafanya mtu kabaki na majonzi
Désespoir na kati ya motema : Moyo wangu wakata tamaa!!!
Soki Likambo nani ako Consoler!!! ikitokea neno, nani yule atakae nifariji!!!
Soki Likambo nani akosalisa : nikipatwa na shida ni yupi atakae nisaidia!!!
Tuna Meje Kanuse ndenge azangaki Mc Mpanda kaka mpo na voyage : Muulizeni Meje Kanusi alivyo mkosa mpenzi wake Mc Mpanda kutokana na Safari.
Marie France Shungu azangaka Béa!!! kaka mpo na Voyage : Marie France Shungu nae kaachana na Béa kutokana na Safari!!!
Tuna Jeannot Canon ndenge azangaki Sabartino kaka mpo na voyage!! :
Muulizeni pia Jeannot Canon alivyo achana na Mpenzi wako Sabartino kisa ni Safari.
Pepo ekomataa!!! Ndege ndo hiyo ya Paa!!!
Masua ekochora ee!!! : Meli nayo yaondoa nanga!!!
Motema mauwaa!!! : moyo unauma na kusononeka!!!
Loboko ekopepa oyo akei!!! Mkono unampepea huyo anae safiri!!!
Voiture yo Complices : Gari nawe pia wanilia njama kwa kumpeleka Mpenzi wangu uwanja wa ndge!!!
Basusu bakokendeke Voyage ya makambo : Wamoja hua wanasafiri kutokana na mambo yao Flani!!!
Basusu bakokendeke Voyage ya Kelasi : wengine wana safiri kutokana na Shule!!!
Basusu bakokendeke Voyage ya Ba Affaires : Na wengine pia husafiri kwa mambo yao ya Biashara…


Happy Anniversary kwetu

August 26, 2013

387285_10150993246120154_773730153_22252945_2020409680_n

Tarehe 24 August 2001 nilifunga ndoa na mke wangu mpenzi Isabella Ghaty, mpaka leo tarehe 24 August 2013 ni takribani miaka 12 tumetimiza. Ni Miaka 12 ya ndoa iliyotanguliwa na miaka mingine sita ya kufahamiana hivyo kufanya maiaka 18 ya urafiki ambayo mi naijali sana.

Nasema naijali kwa kuwa urafiki ndio hudumisha upendo na kama hakuna urafiki ni sawa na kujenga nyumba kwenye mchanga bila misingi imara ni wazi msingi usipokuwa imara lazima ipo siku nyumba hii itaanguka au kama kunatokea dhoruba ni rahisi mjengo huu kuathirika.

Ni miaka 18 yenye historia, kwa vijana tuliooana kwenye umri mdogo chini ya miaka 25 ni wazi tunapitia majaribu mengi kama kwenye wimbo wa Voyage ya Mboso Dominguez amesema Safari isiyo na taa kwani hujui cha kesho ila mnakwenda tuu, mambo mengi yamepitia ikiwemo machungu na mazuri, katika safari ambayo tulishuhudia kumpoteza mtoto wetu Kipenzi Loreen ambaye aliugua na kufariki ghaflam ni machungu ambayo huwezi muadithia mtu lakini kwa kudra zake mola tumeyapita yote na bado tuko pamoja.

Namshukuru Mungu kwa kunipa mke mwema kama wewe Mamaa Ghaty kwani sijuti kukujua na wala sijuti kukuoa natumai Mungu aliye mwema atatuongoza mpaka kifo kitakapotutenganisha. Pia kwa namna ya pekee twamshukuru kwa wanetu Glory na Geebril, twamuomba waongoze na kuwapa hekima ili waweze kufuata nyayo za wazazi wafanikiwe katika maisha yao.

Nawaacha na Kibao Voyaje ya Mboso toka kwao Wenge Musica BCBG chini ya utunzi wa Adolph Dominguez.

Kwa kifupi katika wimbo Voyage (Safari ) Mwimbaji Adolphe Dominguez anaongela Safari na hatari zake kwa wapendanao!!!

Nini toweli ngai nayoo : kitugani kinacho leta ugonvi kati yetu?
Awa natikali Likombe yaya : Tizama ninavyo baki mpweke Kaka yangu!!!

Wapi O remplacer Ngai Voyage : Safari, Lini ukaja kuchukua nafasi yangu kwenye ndoa…

Mbala ya sima nako Refuser : mara nyingine sintokubali (usafiri)
Voyage!!! Ponini usalaka boye!!! : Safari!!! kwanini hufanya hivyo!!!

Okotika moto na Soucis!!! : wafanya mtu kabaki na majonzi
Désespoir na kati ya motema : Moyo wangu wakata tamaa!!!
Soki Likambo nani ako Consoler!!! ikitokea neno, nani yule atakae nifariji!!!

Soki Likambo nani akosalisa : nikipatwa na shida ni yupi atakae nisaidia!!!

Tuna Meje Kanuse ndenge azangaki Mc Mpanda kaka mpo na voyage : Muulizeni Meje Kanusi alivyo mkosa mpenzi wake Mc Mpanda kutokana na Safari.

Marie France Shungu azangaka Béa!!! kaka mpo na Voyage : Marie France Shungu nae kaachana na Béa kutokana na Safari!!!
Tuna Jeannot Canon ndenge azangaki Sabartino kaka mpo na voyage!! :
Muulizeni pia Jeannot Canon alivyo achana na Mpenzi wako Sabartino kisa ni Safari.

Usikose ijumaa nitaumalizia, Shukrani za Kipekee kwa kaka Lubonji wa Lubonji kwa Tafsiri hizi mwanana.


Tafsiri ya Wimbo Dis moi Amour

August 26, 2013

NA LUBONJI WA LUBONJI

Nawaleteeni Tafsiri ya Wimbo Dis Moi Amour ambao unapatikana kwenye albamu ya TH ya Wenge BCBG chini ya JB Mpiana, ni moja ya Rhumba ambazo kiukweli bado zinapendwa sana mpaka wa leo, Shukrani za kipekee kwa Le Suveree Lubonji wa Lubonji ulipotea sana kaka karibu tena natumai umekuja na mengi toka likizo yako.

Wimbo huu ni umeungwa na Kuimbwa na JB Mpiana Mukulumpa Le Maréchal Mukulu.

Seul Les Enfants savent aimer sans calcul. Dis moi Amour I love you:
Watoto pekee ndio wanao uwezo wakumpenda mtu bila hesabu yeyote.

Niambie mapendo I love you…
Comme une graine de diamant dans le deser ,amour je t’avais long temps cherché sans succès!!! sans succès!!! :
Kama vile kutafuta mchanga wa alimasi jangwani, pendo nakutafuta siku nyingi bila mafaanikio

oh ce soir mon coeur me souffle certaine melodie pour toi Amida ,moi ma claté ta beauté un Chef d’œuvres divin :
oh usiku wa leo,moyo wangu wapata pigo na msukumo wa kuimba wimbo huu kwa ajili yako Amida mtoto mwenye uzuri na urembo kutoka kwa Mungu.

Embrassé moi, serre moi dans te bras, mais dis moi pourquoi, tu m’envoûtes si tant,
mon jardin des roses, Amida tu exaltes le parfum du paradis!!! voilà que tu me rends si fou de toi!!! :

Nibusu,nikumbatie,niambie kwanini wanivutia sana namna hiyo, wewe ni bustani yangu ya pink flower, Amida wanukia marashi ya mbinguni,tizama wanifanya niwe kichaa kwa ajili yako.

Je t’aime, i love you,na kupenda sana oooh l’amour toujour, l’amour :
Nakupenda,oooh mapendo kila mara mapendo!!!

Tu fais le bonheur des uns, tu fais le bonheur des autres :
Mapendo !!! waleta furaha na raha kwa wamoja, wajaza majonzi na machozi kwa wengine.

Amour mystère dis moi ton identité eeee!!! qui es tu uuuuuu!!!
Mapendo wewe ni fumbo pia ni siri jitambulishe basi!!! wewe ni naniiiii!!!

Amour dis moi quel est ton Pays, pour que je vienne et que je construise un Paradis plein de toi!!! :
Mapendo niambie inchi yako ni ipi ili nije na nijenge paradise iliojaa wewe peke yako.

entourer d’une muraille de sécurité pour autre amour :
Bustani yenyewe nitaijengea ukingo mrefu wakuzuia pendo zingine zisije kupenya!!! .

Contre les charlatans de l’amour!!! contre les trafiquants de l’amour!!!:
ukingo utakao zuia walaghai wa pamenzi, pia waongo wa mapenzi!!

Amène moi ce soir!!! Amida!!! à la planète Venus!!! Amida, la planète des amoureux!!! Amida!!! conduis mois s’il te plait!!! Amida!!!:
twende wote usiku wa leo!!! Amida!!! kwenye sayari Venus!!! Amida!!! sayari ya wapendanao!!! tuongozane njia tafadhali!!! Amida!!!

Kataja majina kadhaa kwa kuwa dedication : MIMI KALUDJI,NÉNÉ MAKITAKANA,NELLY BOMEI, JACINTHE MWANANGANI, SHANY SHATUR, GRACE NJEKA, LILLY LA RÊVE MATITI…
Asanteni Bana Wenge Musica!!!


Sebene la Ngwasuma Balaa

August 26, 2013

Ni Moja ya bendi za Tanznaia ambayo imekaa kwenye tasnia ya burudani kwa muda mrefu na kujipatia mashabiki wake ambao wengine wanaifata hata iende wapi, majina kama Madenge, J Single, Abdul Tall, Ndama aka Akayesu, Julie Weston Ilunga aka Babaa B na wengineo, ni majina utayasikia kila siku bendi hii ikipiga hata iwe tunduma au Mlimba. Hii ni kuonyesha ni jinsi gani wamejipatia nafasi yao kwenye soko la burudani bongo hii.

Nawakubali sana Ngwasuma ikija suala zima la Sebene, wanavyojituma bila kulewa sifa za mashabiki wao, hebu angalia video hii uone ma stage show walivyolishambulia jukwaa.


Christian Bella Mkali wa Bongo Rhumba

August 26, 2013

Kipimo kikubwa cha mwanamuziki hasa wanaoimbia kwenye bendi ni pale wanapotaka kutoka peke yako (Solo). Nasema ni kipimo kikubwa kwani hata waliona majina makubwa wamejikuta wakibwagwa na soko na mashabiki na wengine wameishia kubadili fani. Nani asiyejua Kilichompata Adolph Dominguez, Blaise Bulla, Titina Alcapolne na wengineo wakubwa wanje kwa humu ndani kuna watu kama Ndanda Kosovo Kichaa, ambaye kwa wakati fulani jina lake lilikuwa juu akaamua kutoka kivyake lakini hakufanikiwa.

Nimeanza na kukukumbusha hilo kwani kwa mwanamziki kama Christian Bella angeweza kuwa Ferre Gola wa Tanzania na kama napata nafasi ya kuongea naye ningemwambia akomae kwenye nyimbo za taratibu tuu, Bella ni mmoja wa wanamuziki ambaye si tu anakipaji kikubwa cha utungaji bali hata cha kuimba bila kukinaisha. Sio kila mwanamuziki anaweza kuimba wimbo mrefu akakuvutia lakini nachelea kusema kuwa Bella ameonyesha kuwa anaweza.

Aina ya muziki anaopiga kiukweli huwezi kufananisha na wengine kwani anauwezo wa kujitengenezea mashabiki wake tuu, Tanzania hakuna bendi ya muziki wa dansi inayopiga Rhumba kiukweli, na ndio maana kwenye albamu ya Dunia Kigeugeu ya FM Academi nyimbo kama Acha Tamaa zilishika na bado watu wanazipenda mpaka wa leo kwani ni aina ya nyimbo ambazo ni nadra sana kuzisikia. Binafsi natamani sana niendelee kumsikia mtu kama Bella akiendelea na Marhumba haya ya ukweli atupe burudani mashabiki wa Rhumba.

Bella anaweza kabisa kuendelea aina hii ya muziki ambayo itakuwa ni style yake, kiukweli nimemiss kusikia hivi vitu toka kwenye bendi za densi za nyumbani Bongo Rhumba ni style ambayo Bella, au Rogert Hega au Ige Muyamba wanaipatia sana sijui ni kwanini tu hawatii mkazo humo.

Ukisikiliza wimbo huu ambao ameshirikiana na mtaalamu mwingine wa masauti Banana Zollo utakubaliana na mimi kuwa Bella ni kiboko. Nakutakia Jumatatu tulivu.


Harusi ya Zadio Kongolo gumzo Congo

August 25, 2013

Ni mtu wa karibu sana kwa Muziki wa Kongo na shabiki namba moja wa JB Mpiana akisifika kwa utunzaji wake ambapo kwa kuthamini hilo JB Mpiana ameshamtungia nyimbo kadhaa mbali na kumtaka kwenye karibu kila wimbo wake.

dedication

Ni mfanyabiashara wa madini na mtoto wa mjini mtafuta maisha ambaye anatumia kila njia kujipatia kipato chake. Harusi hii mbali kutumbuizwa na bendi kadhaa ilihudhuriwa na matajiri na watu maarufu wakiwemo wanamuziki mbalimbali wa Congo.

Kwa mujibu wa mtangazaji maarufu wa Luninga na mtengenezaji wa vipindi vya majadiliano almaarufu kama Zacharia Bababaswe anasema kwamba Harusi hii pia imetajwa kuingia kwenye historia ya moja ya harusi kubwa kupata kutokea kwa Mkongoman si tu ukubwa wa Harusi bali iliyogharimu pesa nyingi sana.

Zadio amemuoa mpenzi wake wa siku nyingi binti mrembo anayejulikana kwa jina la Carole katika sherehe zilizofanyika huko huko Ufaransa. Zadio au ZK kama alivyoitwa na mashabiki wake anajulikana kwa style yake ya utunzaji awapo jukwaani ambapo kuna wakati anatunza mpaka dola zaidi ya 20,000 katika show moja.

Nikuache na kibao ZK aka Zadio Kongolo toka kwake JB Mpiana, akiwa na Wenge BCBG kikiwa ni mahsusi kwa kijana huyo tajiri.


Bado “namlilia” Chai Ngenge

August 25, 2013

Kiukweli naipenda sana Wenge BCBG na huwa siwezi kuficha hisia zangu kwenye hilo, lakini kwa miaka ya karibuni karibu watu wote ambao binafsi nilikuwa nawapenda sana ndani ya bendi hii wameondoka.

Pengo kubwa la kwanza kwangu ilikuwa kuondoka kwa Aimelia ambaye nilimpenda sana alivyokuwa akichanganya sauti yake humo, ila huyu hakuniuma sana kwani JB Mpiana alikuwa na uwezo wa kuliziba pengo lake vilivyo na kwa wasio wajua kwa sauti zao huwezi kujua akiimba JB Mpiana au akiimba Aimelia Lyase Doming’ong’o. Pia kwa mtu kama Titina Alcapone ambaye aliwachezesha vilivyo kwa upigaji wake hatari wa drums, kidoogo naye amepokewa vizuri na Seguine Mignon ambaye kwa kiasi kikubwa amekuwa ndiye mpambe wa kribu kabisa wa JB Mpiana na muda mwingi anakuwa naye na ndiye mtunza siri wake huku wangine wakimtania kuwa Kaka yao akina Daida, waototo wa JB Mpiana.

Pendo jingine ambalo bado naliomboleza mpaka leo ni kuondoka kwa Allain Mpella Afande ambaye kwenye wimbo huo hapo anasikika kuanzia 4:06 na sauti yake mwanana, kiukweli Pengo la Afande halijazibika mpaka leo kwani alikuwa akiimba sauti ya Pili na ya Tatu vilivyo. mbali na wengine ambao waliondoka ondoka hapo katikati kwa sababu moja au nyingine.

Sio siri kuondoka kwa Tutu Kaludji pia kulikuwa tingisho jingine kwa JB Mpiana, lakini kwa wafuatiliaji wa mambo walilijua hili hata JB Mwenyewe alilijua pia na kumpa nafasi zaidi Genta Macine ambaye ndiye atalaku namba moja, nasema hivi kwa sababu habari za Tutu Kaludji kutaka kuondoka zilianza tangu 2010 na Kaludji anasemwa alijikita zaidi kwenye kuimba na ndipo wapambe wakamstua JB Mpiana kuwa jamaa anataka kuondoka na alikuwa na mpango wa awali wa kutoa nyimbo zake jambo ambalo JB hakulifurahia.

Wakati anatunga kibao cha Tchico Londonien inasemwa alitaka kiwemo ndani ya albamu yake na ndipo hapo walipoanza misuguano ya chini kwa chini na Boss wake JB Mpiana, inasemwa mgogoro wao haukuwahi kuripotiwa popote lakini watu wa karibu walijua na walikuwa wakichekeana na kukaa pamoja lakini kila mmoja rohoni alikuwa na yake. JB Mpiana sio mtu wa kisasi na hapendi kusemwa pembeni ili kusimamia hilo JB huwa anavijana wake ambao amewapandikiza kwenye bendi ili kumpa taarifa na mmoja wapo ni Seguine Mignon ambaye anatoka kabila moja na JB Mpiana.

Seguine Mignon (Segee) ndiye mpambe wa JB Mpiana anayeogopwa sana na wana bendi kwani anaushawishi mkubwa sana na amewatupa wapambe wengine mbali, Seguin anaaminiwa sana na JB Mpiana kiasi kwamba hata wakiwa kwenye show chupa ya maji ya kunywa ya Mukulu JB Mpiana anaishikilia na kukaa naye Seguin.

Ukaribu huo ndio uliomgharimu Chai Ngenge ambaye aliwahi kuwa rafiki na swaiba mkubwa sana wa JB Mpiana. Chai Ngenge alikuwa karibu sana kipindi JB Mpiana anapata matatizo na mkewe Amida Shatur na alimfariji mnoo na kumuuunganisha kwa Mchungaji ambaye alisaidia kumpa moyo na mafundisho JB Mpiana jinsi ya kukabiliana na hali hiyo kwanni alimpenda sana mkewe.

Chai alikuwa na mapenzi makubwa sana na Wenge kiasi alijitoa mno lakini ukaribu wa Seguin na JB Mpiana ulimfanya akarudisha moyo nyuma jambo lililomgharimu mwishoni.

Walipokuja nchini nilipata nafasi ya kukutana na Chai Ngenge kwenye Mgahawa wa Food World alipokwenda kununua simu akiwa na wapambe nikajitambulisha na kupiga naye stori sana kiasi alinipa hadi namba yake ya simu tukawa tunawasiliana, shukrani kwa Papaa Julie Weston Ilunga Presidaa na Bana Kongolee na Darisalama ambaye alinikutanisha na wadau hawa mara zote wakija nchini.

Chai ametunga nyimbo kadhaa kwenye kila albamu ya BCBG jambo lililomfanya awe ni mtu muhimu kwenye bendi, sidhani kama JB Mpiana halitambui hili ila hakuna jinsi tayari keshaondoka acha maisha mengine yasonge, nitamuomboleza Chai Ngenge daima.


Changamoto kampeni ya FUTA DELETE KABISA

August 23, 2013

“…Mapicha haya ndio mwanzo wa kuenea kwenye mitandao, hivyo inapaswa kuelimishwa umuhimu wa wao kwani kuwa na mapicha ya matusi kisheria ni kosa la Jinai mbali tu kuwa ni kosa la kimaadili…”

futa delete kabisa

Nimefurahishwa sana na hii Kampeni ya Futa Delete Kabisa ambayo inaongozwa na Tume ya Mawasiliano sio tu kwa sababu ni Bloga bali kama mtanzania wa kawaida ambaye nilikuwa nakerwa sana ama na meseji ama email ama articles kwenye baadhi ya blogs mbalimbali zikisambaza emails za ajabu ajabu au jumbe zenye matusi au maneno yasisyofaa.

Nasema hivyo kwa sababu kwa ulimwengu ulivyo sasa hivi watoto wadogo wamekuwa exposed kwenye ulimwengu wa teknohama tofauti na enzi zetu sisi jambo linalofanya upatikanaji wa habari usitegemee magazeti, TV na Radio tu kama ilivyokuwa zamani.

Nimeipenda na naunga mkono kampeni hi kwa asilimia mia moja (100%) na iendelee Tanzania nzima. pia napendekeza elimu hii iende mbali zaidi kuelekwa na kuingizwa kwenye somo la elimu ya uraia mashuleni ili waototo waanze kuambiwa tangu wakiwa shuleni ubaya wa kueneza ujumbe ambao unamadhara kwa jamii.

Kwa kampeni iliyopo sasa mimi naona pia pamoja na mambo mengine ilenge kuelimisha watumiaji na wamiliki wa Komputa hasa Komputa Mpakato ambao wengi wao ni wanafunzi kuwaelimisha kusafisha Kompyuta zao ikiwa ni kutoa Picha na Video zisizo faa kwenye kompyuta zao.

Binafsi ni mtaalamu wa mifumo ya kompyuta jambo linalofanya vijana wengi waniletee kompyuta mpakato zao (Laptop) ama nizifanyie matengenezo au kuziwekea programu, kiukweli ukiangalia Kompyuta nyingi zina mapicha ya ajabu ndani yake zikiambatana hata na video ambazo ukiuliza mtu atakwambia amepewa ama kuchukua kwa rafiki yake.

Mapicha haya ndio mwanzo wa kuenea kwenye mitandao, hivyo inapaswa kuelimishwa umuhimu wa wao kwani kuwa na mapicha ya matusi kisheria ni kosa la Jinai mbali tu kuwa ni kosa la kimaadili. hivyo ni jukumu letu kama jamii kukumbushana kuhusu maadili kabla ya wasimamizi wa sheria kusimama kuchukua sheria kwani itakuwa unamshurutisha mtu na inawezekana hata baada ya adhabu asibadilike, jambo litakalopelekea yeye kuendelea kufanya na kusambaza picha zile.

Nasema hivi kwa sababu wanafunzi wanatabia ya kuazimana laptop kwa mfumo huu unaweza kuta picha zinasambaa na wengine wanahamishia kwenye simu na kuzisambaza zaidi. Hivyo ni jukumu la kila mwanajamii kuhakikisha anaeneza elimu hii ya Futa Delete Kabisa kwa wanaomzunguka kutokana na kilichopo mbele yake kwa wakati huo, vinginevyo tutaishia kukuza jamii ambayo haina maadili.


Satelite Remix ya Werasson–Ijumaa Karim

August 23, 2013

La Brigedeer Suvereign Mukulu Mabamba Abiud Maregesi anasema kiukweli akitaka Sebene huwa anakwenda kumsikiliza Werason na kama ana kiu ya kusikiliza “Kwaya” huwa anakwenda kwa JB Mpiana maana huko utapata mpangilio wa sauti.

Shabiki wangu Swaiba wangu Tekno Malewa najua naye anayake ya kumfanya awe shabiki mkubwa wa Werasson, kwangu mimi hamna show ya Werasson ambayo sina kwenye kabati langu la Congo Moto kama ninavyoliita na sababu zangu ni kama za Mukulu wa bakulu Mabamba.

Ijumaa tulivu hii nakuacha na kitu Satelite Remix toka kwa Werason naomba unipe na we sababu zako….!!!


Koffi Olomide anunua Rolls Royce Phantom na kuitambilisha kwa watu wake.

August 23, 2013

Ukiwataja wanamuziki matajiri basi Koffi ni mmoja wao, akiwa anamiliki 5 Star Hotel na akiwa na hisa kwenye kampuni kadhaa ndani ya Congo na nje ya Congo Koffi anaorodheshwa kuwa ni mmoja wa wanamuziki ambao wamefaidika vilivyo na muziki wao.

koffi-olomide-offre-rolls-royce-femme-L-GjQJ2D

Majuzi Koffi aliingiza gari mpya Model ya 2012 aina ya Rolls Royce Phantom na kuitambiulisha kwa mashabiki.

264517_643109372371271_1893476095_n

Pichani Koffi Olomide akiwa mbele ya gari yake. Koffi ametangaza kung’atuka kwenye shughuli ya Muziki baada ya kutoa albamu yake mpya ambayo iko studio kwa sasa, Hii itakuwa ni Albamu ya 20 ya mwanamuziki huyu ambaye anamaliza akiwa na mafanikio na mpaka sasa albamu zake tatu zimeorodheshwa kwenye listi ya albamu 1000 ambazo unapaswa kusikiliza kabla ya kuondoka duniani (kufariki).


Mkongwe Chai Ngenge ajitoa Wenge BCBG

August 23, 2013

Wimbo Le duo de Paris toka albamu ya Internet ambao ni utunzi wake Chai Ngenge

********************************

Mdudu wa kuondokewa na wanamuziki unaendelea kuitafuna bendi ya Wenge BCBG chini ya uongozi wake JB Mpiana, baada ya kuripotiwa kuondoka mwanamuziki Djino miezi kadhaa iliyopita, habari za uhakika kutoka ndani ya Club ya Wenge BCBG zinasema kuwa mwanamuziki mkongwe Tshai Ngenge naye ameondoka kwenye bendi hiyo.

Zikieleza chanzo cha kuondoka kwenye bendi ni hatua ya utovu wa nidhamu iliyoonyeshwa na mwanamuziki huyo hata baada ya kukanywa mara kadhaa bila kujirekebisha “…Chai Ngege alikuwa na tabia ya kuchelewa kwenye mazoezi jambo ambalo lililalamikiwa na kiongozi wa safu ya wanamuziki hao Seguen Mignoni (Segee Minyoo)” kilienza chanzo chetu.

Kitendo hicho kilichukuliwa kama dharau na hasa Chai Ngenge alifanya hivyo akisikia JB Mpiana hayupo au atachelewa kufika mazoezini basi na yeye atachelewa au hata akiwahi atabaki ndani ya gari akiongea na simu zake bila ya kujiunga na mazoezi. Tshai Ngenge ni mmoja wa wanamuziki wakongwe na waliojiunga siku nyingi na JB Mpiana hivyo anachukulia uzoefu wake na ukongwe kuwadharau wengine, kiliongeza chanzo hicho.

Ilipofika siku ya siku wakati BCBG wanajiandaa na safari ya kwenda kwenye show Congo Brazaville wakiwa kwenye mazoezi Chai Ngenge alifika akama kawaida akiwa amechelewa jambo lililomuudhi Seguin ambaye ndiye mpiga drum namba moja wa BCBG na kiongozi wa wanamuziki na ndiye anayesimamamia mazoezi, alimuamuru asijiunge na wenzake na baada ya kujibizana na kutupiana maneno kadhaa ya kasha Tshai Ngenge aliamua kususa na kukaa pembeni akimsubiri Big Boss JB Mpiana aje aamue ugomvi, alipofika mazoezini kumbe JB Mpiana alikuwa tayari ameshapewa mkanda mzima na ikumbukwe kuwa Seguin ndiye “mtoto wake” JB Mpiana na msiri wake mkubwa, hata wakiwa kwenye show JB Mpiana chupa yake ya maji ya Kunywa anakaa nayo Seguin hata Baunsa wake haishiki, hivyo inaonyesha ni jinsi gani anamuamini, na kuna kipindi alikuwa akiishi naye nyumbani kwake, hivyo JB Mpiana aliitisha kikao cha Wakurugenzi na ikaamuliwa Chai Ngenge asimamishwe kwenye Band na kutolewa kwenye Ziara zote za BCBG jambo ambalo mwenyewe aliamua pia kuandika barua ya kujitoa na kubaki na hisa zake tuu kwani Wenge ni Kampuni ambayo wanamuziki wanahisa.

Chai ameshiriki kutunga nyimbo nyingi ndani ya Wenge BCBG kama Le duo de Paris (Internet), Identite d’amour (Kipe Ya Yo), Mbua (Soyons Serieux) na nyingine nyingi.

Kwangu bado Chai Ngenge ni jembe ambalo JB Mpiana alikuwa anahitajika kuendelea kuwa nalo.


Afande Allain Mpela alipovamia jukwaa la BCBG

August 23, 2013

Kwa wafatiliaji wa muziki wa Congo, Mashabiki wa toka Wenge Muzika mpaka Wenge BCBG watakubaliana na mimi kuwa kuondoka kwa Allain Mpella katika kundi la Wenge BCBG ni moja ya pengo ambalo kiukweli si tu lilimuuma sana JB Mpiana bali mashabiki wote kwa ujumla, hata alipoombwa kurejea bado Afande alionyesha ugumu kufanya hivyo.

Kuna wakati alijaribu kuingia kwenye siasa na kujaribu kugombea Ubunge kwenye uchaguzi wa 2011 lakini hakufanikiwa baada ya mpinzani wake kumshinda kwa kura chache. Afande ambaye baaya ya kuondoka kwa Wenge BCBG alijaribu kutoka kivyake kwa kushirikiana na mdogo wake wa damu aliyejulikana kama Geco Bpuro Mpella ambaye alilelewa na kutambulishwa kwenye muziki kupitia kundi la Quartier Latin chini ya kamarade Koffi Charls Olomide ambaye ametangaza kung’atuka muziki karibuni.

Bado binafsi namkumbuka Mpella hasa nikisikiliza Albamu ya Titanic nyimbo kama Process Mambika, Serge Palmi, na nyinginezo ambazo ziliingarisha sana na kwangu mimi ile inabaki kuwa ni moja ya albamu bora kabisa kwa JB Mpiana tangu ajitenge na Werasson.

Pichani juu Afande alipopanda jukwaani kama mwanamuziki mualikwa wakati JB Mpiana alipotumbuiza huko Kinshasa hivi karibuni. Siki ajinsi JB Mwenyewe alivyokuwa akimuita Afandeee na ye kumuitikia Suvereeeee, JB Alitoa machozi baada ya Afande kukabidhi Mic na kushuka jukwaani, hii ni dhahiri kwani takribani mwaka sasa JB amekua akianza na wimbo Omba kwenye show zake ambapo huko mbeleni anawataja wanamuziki wote na kisha huwa anawalilia sana Afande na Caludji ambao wote waliondoka wakatii bado mashabiki wanawahitaji, Caludji kwa sasa ameokoka na kuachana na nyimbo za kidunia.

Shukrani na salamu za kipekee kwako Papaa James Masele Liberko la Loi nakati ya Shinyanga, huyu ni mdogo wake wa damu Mheshimiwa Naibu Waziri Le Suvereign Mukulu wa Bakulu Steven Masere ambaye ni shabiki nambari One wa JB Mpiana, Presidaa na Bana BCBG Club Mu’ Darisalama. Kitoko Makasi, Merci Mingi.


Wamtambua nani hapa?

August 20, 2013

image


Soleil Wanga alia na Binti wa Denis Sassou Ngueso

August 16, 2013

Purukushani ni kubwa sana kwa wanamuziki wa Congo hasa kizazi cha tano  ambacho kwa kiasi kikubwa wamekuwa wakali sana kwenye nyimbo za taratibu. Soleil Wanga sio jina maarufu ni lazima uwe mfatiliaji wa muziki wa Congo ndio unaweza kumjua jamaa huyu, Binafsi yangu namkubali sana na huwezi amini huyu jamaa kwa East Africa huyu bwana Agenti wake ni Mamaa Sophia Kessy, binti mdogo Mtanzania anayefanya kazi na Clouds Media.

Wimbo huu Soleil Wanga kama walivyo akina JB Mpiana, Werrason, Koffi na hata FAlly Ipupa amemuimbia Binti wa Rais Denis Sassou Ngueso anayejulikana kama Cloudia Sassou (Pichani juu) ambaye kiwadhifa ni Waziri wa Elimu, Binti huyu mwanadada mrembo ni shabiki mkubwa wa Muziki wa Congo na mara kwa mara amekuwa akialika na kudhamini show kadhaa za wanamuziki hawa nchini wake.

Ni rahisi kuwa wa kwanza ila ni kazi sana kuendelea kuwa wa kwanza, Muziki wa Congo unategemea na nyota, inaategemea na nyota yako imeng’aa vipi kwani kama kuimba mi naimani kabisa Ferre Gola anaimba zaidi ya Fally Ipupa lakini Fally Ipupa ni maarufu na anapendwa zaidi kuliko Ferre, huo ni mtazamo tuu.

Msikilize Soleil Wanga kwenye kipande hiki Bougie en ambacho amekiimba kwa umaridadi mkubwa sana, shukrani za Kipekee kwa Swaiba wangu Husna Hamis Renee De Afrique Pride Fm Mtwara na Suveree big up kwenu, Bahati wa Moshi FM Radio. tuko pamoja.

 

ugie en


Un Prince au Congo; Mabanga ya Wera kwa Marehemu Alici Baba

August 16, 2013

Kiukweli bado kwangu albamu ya Kibuisa Mpipa inabaki kuwa ni moja ya Albamu Bora kabisa kuwahi kutokea kutoka kwenye kizazi cha nne cha muziki wa Congo. BAdo Werasson aikuwa na vionjo vya Wenge Musica na mpaka kipindi hiki nilikuwa bado sijaamua kuwa kambi gani kwani wote walikuwa wakinifurahi sana mpaka nilipoamua kuwa gawa kutokana na nini nataka kusikiliza kwa wakati husika.

Sijawahi kumchukia Werason hasilani ila nikitaka kusikia Sebene ni wazi huwa nakuja kwa Werason na nilitaka kusikia “Kwaya” mpangilio wa sauti kama anavyosema Swaiba wangu Mabamba Maregesi huwa namuweka JB.

Katika Albamu hii kwa kweli sikuwa nafrward wimbo wowote na huu ni moja ya nyimbo ambazo nilizpenda sana kwenye albamu ya Werasson na hapa alikuwa akimtukuza swaiba wake Alici Baba na kuipa jina la Un Prince au Congo akimaanisha Mtoto wa Mfalme wa Congo jina ambalo alijulikana na kuitwa na kila mmoja wakati wa uhai wake. Inasemekana Alici Baba alipenda sana kuishi maisha ya Kifalme, maisha ya kifahari ambayo pia hayakumfanya ajiweke mbali na watu.

Pata burudani huku ukimuomboleza


Buriani Alici Baba, Mfalme wa Muziki wa Congo

August 16, 2013

Na José Mkapa lkombe

Kwa mashabiki wa muziki wa Congo jina Alicibaba sio geni kwani ama umelisikia kwenye nyimbo likitajwa au kufahamu shughuli zake, akiwa amekulia kwenye ulimwengu wa muziki wa Congo na kupata umaarufu, Alicibaba amepumzishwa kwenye nyumba yake ya milele majuzi jumanne .

Alici Baba ambaye mashabiki wake wakimuita AKenda kenda, Azonga Zonga, Akota kota , Un Prince à N’Djili, Mfalme wa Congo (un Roi au Congo), Mfalme wa Afrika un Roi en Afrique alifariki August 4 mwaka huu ambapo mwili wake ulikuwa umehifadhiwa kwenye Kliniki ya Ngaliema na kuzikwa juzi August 13 katika makaburi ya Mbenseke Futi, mazishi ambayo yalihudhuriwa na mamia kwa maelfu ya wanamuziki. Kwa mujibu wa washiriki wanasema maziko aliyoyapata Alici Baba ni makubwa mnoo ambapo mamia kwa maelfu ya watu walijitokeza kumuaga Mdau mkubwa wa Werasson Ngiama Makanda.

Mazishi ya “Mfalme” huyo wa Congo na Mji mdogo wa N’Djili yalizua taharuki kwani katika mji huo wa N’Djili kila kitu kilisimama pale msafara ulipopita kwenda mazikoni na mamia ya waombolezaji wakiufata kwa nyuma. Alici Baba ambaye jina lake kamili ni Musuapo Nkie-Kunde Alexis Alici Baba ameacha mjane na watoto kumi na mbili


“100% Mutuashi” Mpya ya Tshala Muana kuenzi miaka 35 ya katika muziki.

August 13, 2013

Katika kusherehekea miaka 35 ya kuimba, mwanamuziki machachari wa DRC Tshala Muana ametoa Albamu mpya itakayo itwa 100% Mutuashi, MAlkia huyo wa Mutuashi alisema.

Katika kuenzi mwanamuziki huyo Waziri wa Vijana, Michezo, Sanaa, Utamaduni na Jinsia, Familia na Watoto ameandaa sherehe kwa heshima ya malkia huyo kwa ajili ya kumpongeza ( Youth, Sports, Arts and Culture and Gender, Family and Children).

Vundula ni moja ya single zinazopatikana kwenye albamu hiyo ambazo zinafanya vizuri na Malkia huyo ameonyesha kuwa bado yumo. Tshala Muana anajulikana kwa vituko vyake awapo jukwaani, kuna kipindi alikuja Tanzania na Mheshimiwa Waziri Mkuu Mstaafu John Sigwiyemisi Malecela alikuwa mgeni rasmi ukumbi wa Diamond Jubilee alipotumbuiza mwanamama huyu, nusu azue taharuki alipopanda jukwaa kuu la wageni rasmi na kuanza kunengua jambo lililozsha kelele za kushangiliwa na mashabiki waliofurika kwenye show hiyo.

Tshalla muana ndio alimtambulisha Meje 30 kwenye ulimwengu wa Muziki ingawa mwanadada huyo alianza siku nyingi na pia aliwahi kufanya majaribio kwa mwanamuziki Koffi Olomide akiwa na Cindy na Cindy alishinda, ndipo Tshalla muana akampika na sasa Meje 30 anatisha.

Kwa mujibu wa waandaji wa shughuli hiyo Mheshimiwa Waziri Baudouin Banza Mukalay Nsungu ndiye atakuwa mgeni rasmi na imepangwa kufanyika Augosti 31 katika bwawa la kuongelea Grand Hotel Kinshasa.

Kama kawaida Spoti Starehe itakuhabarisha kilichojiri.


Namlilia Madilu

August 13, 2013

Na Hadj Le Jbnique,Boston,Ma,USA.

Leo ni siku ambayo ulimwengu mzima wa wazungumza lingala na wapenzi wa muziki wa lingala duniani kote hawataisahau,ni siku ambayo walimpoteza kipenzi chao Madilu Multi System.

Jean de Dieu Makiese a.k.a. Madiluu alizaliwa  May 28, 1952 katika jiji la   Léopoldville ambayo ndio Kinshasa ya leo nakufariki dunia  siku kama ya leo yani August 11, 2007.Madilu alianza kuimba rasmi 1969 akipitia bendi mbalimbali mfano Orchestre Symba, Orchestre Bambula ya Papaa Noel bila kuisahau Festival des Maquisards ya mzee Sam Mangwana. Baadae Madilu alianzisha bendi yake mwenyewe ikiitwa  Orchestre Bakuba Mayopi.Lakini kote huko hakuna aliemfahamu madilu duniani mpaka alipoungana na mzee Franco ambapo ndipo mzee Franco akambatiza  jina hili la Madilu System lililokuja kuwa maarufu ulimwengu mzima akijulika hivyo badala ya jina lake la asili yani Jean de Dieu Makiese.Akiwa na mzee Franco na TP OK JAZZ nyimbo ambayo ilimtoa madilu ilikua ni “Mamou” ambayo ilikuja kuwa nyimbo bora kwa mwaka 1984.Lakini hiyo ilikua ni nyimbo ya bendi ambayo madilu alishiriki tu kuiimba na kuifanya sauti yake isikike na kutambulika ulimwenguni na watu kumjua,lakini madilu alikuja kuuthibitishia ulimwengu kwamba anao uwezo na kipaji cha kutunga na kuimba mwaka 1986 alipotunga yeye mwenyewe wimbo unaotamba mpaka leo kwa bendi mbalimbali kuupiga kama copy “Pesa Position” na baadae wimbo “Mario” na kuendelea na nyimbo kibao ukiwemo “La Vie des Hommes” ambao waliufanya kwa pamoja ( duets) yeye na mzee Franco mwenyewe.

Baada ya kifo cha mzee Franco TP OK JAZZ ilisimama kufanya shughuli za muziki kwa mwaka mzima,lakini baadae TP OK JAZZ Ikarudi upya chini ya Madilu ambae alijaribu kuileta TP OK JAZZ pamoja na kutoa mchango mkubwa kuhakikisha inasimama.Baadae Madilu akarejea kuendeleza solo career yake kama yeye huku akiweka makazi yake ulaya zaidi kwenye miji ya Paris na badae Geneva,Switzerland lakini huku nyumbani Kinshasa akiendelea kuwa na kiwango kikubwa cha mashabiki pia.

Mwanzoni mwa mwaka 2007 sikumbuki sawasawa mwezi gani Madilu alirejea Kinshansa mara moja kwa lengo la kufanya shooting kwa ajili ya video za nyimbo zake.Akiwa katika harakati za kukamilisha kilichomrejesha Kinshasa then arudi zake kwake Ulaya siku ya ijumaa ya August the 10th 2007 Madilu alianguka ghafla na kukimbizwa hospitali ya chuo kikuu cha Kinshasa ambapo asubuhi ya siku iliyofuata yani August 11th,2007,Madilu alifariki dunia.

Madilu alikua kipenzi cha watu wengi hasa tabaka la watawawala wa nchi za AFRIKA kiasi cha kupata mialiko mingi ya kutumbuiza kwenye hafla za marais mbalimbali  wa nchi za Afrika ya kati na magharibi.Mfano ni hii hafla iliyofanyika ikulu ya GABON ambayo ili ni  ANNIVERSAIRE ya Mokonzi wa bakonzi le prezidaa OMAR BONGO na mkewe Mamaa EDITHA SASSOU NGUESSO ambae alikua ni binti wa rais wa Congo Brazzaville DENNIS SASAAOU NGUESSO,walikua wakisherehekea miaka kadhaa tangu waoane ambapo mkitazama vizuri mzee DENNIS SASSOU NGUESSO nae mtamuone hapo kwenye big Party ndani ya ikulu ya Gabon,mamaa Editha mtamuona hapo kwenye dancing floor akiwa amevaa gauni refu la kijana huku akicheza muziki wa madilu na mumewe Omar Bongo.Rais OMAR BONGO na Mkewe huyo nao kwa sasa wote ni marehemu.

Mungu awalaze pema wote watatu,Madilu,mzee Omar Bongo na mamaa Editha.


%d bloggers like this: